A promesa, selada con sangue aos 16 anos de idade, de que falaría sempre galego axúdannos a entender o compromiso político de Manuel Antonio; as cartas que lle mandaba, con 17, á súa moza ofrécennos pistas sobre a personalidade íntima do autor e súa biblioteca particular permítenos afondar na súa relación coas vangardas europeas. O académico Xosé Luís Axeitos, un dos encargados de desenvolver o proxecto de musealización da vivenda onde naceu o escritor rianxeiro, destaca que se propoñen “diferentes lecturas”, o que fará a visita “atractiva para distintos tipos de público”. A Casa de Manuel Antonio, destaca Axeitos, non se pode comparar con ningún outro recinto dedicado a un escritor galego. “A súa concepción é moi novidosa e actual, con gran vocación de futuro”, asegurou en Radiofusión.