Na zona expositiva, un dos espazos dos que conta o evento, atópanse os stands das entidades participantes. Casetas onde as organizacións exhibirán ao longo de catro xornadas todos os seus proxectos e programas de traballo. Entidades relacionadas coa saúde, a discapacidade e as enfermidades mentais, como a Asociación de Persoas con Trastorno Bipolar de Galicia, a Asociación de Pais de Persoas con Discapacidade ou a Federación Galega de Dano Cerebral; organizacións de longa tradición, como Cáritas, Cruz vermella ou Mans Unidas; e asociacións relacionadas coa flora e a fauna, como a Asociación Protectora de Animais sen Fronteiras, son algunhas das entidades participantes.

O segundo espazo da Feira está dedicado ao desenvolvemento de diferentes actividades de ocio, abertas a todo o público. Alí terán lugar desde actuacións de música e danza ata diversas exposicións e a realización de obradoiros de globoflexia, maquillaxe ou de títeres. As actividades da Feira terán continuidade ata a noite do domingo 24.